REMEDIU ESCONTRA LA CRISIS

                             



                                        
                                                REMEDIU ESCONTRA LA CRISIS   

  D`OBLIGÁU CUMPLIMIENTU

 Dende lo fondero del mio corazón, pínchenme dalgunes idees que si nun les dexo salir amenacen con dame un puntillazu con remate d`estocada.

    

       Ehí van dalgunes d`elles:

     

D'obligáu cumplimientu pa tolos políticos que piensen qu`una vez que-yos damos de prestáu'l nuestru votu yá tienen derechu d`acomodu na poltrona y facer lo que-yos pete, han de cumplir los requisitos darréu:

      

 Vivir seis meses nuna casa de trenta metros, disfrutar del sueldu base y, d'ehí, pagar cebera, lluz, agua, gas, averíes, qu`habeles hailes; amás de los impuestos que-yos correspuenda, colos qu`hai de cumplir como bon ciudadanu.

      

 Superada esa caxigalina, ¡hala! Un contratu prueba, como'l que les empreses requieren a tou obreru, onde demuestren la so valía. Si son bonos gobernantes, a gobernar pa tol mundu; si nel tiempu estipuláu nun dan pie con bola, y más que gobernar desgobiernen, al paru ensin lliquidación.

      

Si por un casual al ex-y sal un contratu nuna empresa d'eses que paguen con xenerosidá pringues dividendos a  “altos” executivos, ex presidentes: ¡quietu paráu!: incompatibilidá pa cobrar.

       

 Prohibida toa esa riestra millones que los “altos” direutores de bancos, “altos” conseyeros d'empreses se reparten dexando al personal y a la ciudadanía con tres cuartos de narices, ensin la posibilidá d'algamar un créditu pa salvase de perder la casa. Los banqueros queden coles cases de los probes que pierden el trabayu y nun son a pagar la hipoteca. Non contentos col pisu, el paráu queda ensin casa, col culu na cai y cola obligación de siguir cebando al bancu. Esi robu a sacos enllenos tien que tar prohibíu por llei.

     

Qué dicir de les empreses que nun se ven fartuques y marchen a ufiertar trabayu a los probes de los países probes. Yá saben: los que trabayen xornaes de matacaballo, doce, catorce o dieciséis hores ensin atrevese a llevantar la xugular. A diches empreses nun-yos duel prenda dexar tiraos a los trabayadores d'equí. Aguyen que tán fartos de nós, qu'hai abondos famientos dispuestos a doblar l'espinazu namái que per un platu arroz y un corteyu pan.

        

 Llueu queden les tribos d'acaparadores y falcatrúes que nun se conformen col sueldazu qu'avergoña hasta a les piedres del camín. Los que roben a sacu enllenu los cuartos que pagamos ente toos. Pa esos, lleis dures y a devolver colos réditos lo que nun ye d`ellos.

     

Fuera especuladores que-yos da lo mesmo dexar col culu al aire a una familia o a una nación con tal de medrar la so cuenta bancaria. Si esta amenaza con reventar, nun seyáis ilusos. ¿Pa qué tán los paraísos fiscales?

       

Escuchar telediarios y lleer la prensa ye d'infartu. Guerres y más guerres, fame y más fame enquistada na médula y nos güeyos de millones de desarrapaos al borde`l cantil ensin un solu resquiciu d'amarre al qu'agarrase.

         

Mientres los que gobiernen afanen millones, tolos millones pa comprar armes capaces de matar al lluceru del alba que s`atreva a pestañear.

           

En tornu a meses engalanaes de copete y troníu, los mandamases, acomodaos nun barullu d'intermitentes coldazos, de dimes y diretes, en discusiones vacíes que nun pasen de promeses rezumando cuchu y manes que fieden a muertu.

          

Petezme dir al principiu d'esta historia. ALCUÉRDENSE:

         

D'OBLIGÁU CUMPLIMIENTU. A lo meyor ye sólo'l principiu pero, el que nun dea la talla pa gobernar, cero favoritismos y a facer cola nes puertes del paru.