ADICTA A LA PALLABRA ESCRITA

          

     Finalista del II Concursu de Cuentos Curtios l`Horru del Carbayedo 2008

Güei apetezme escribite a ti:

            Dempués de tantu tiempu d’adicción a ti, nun puedo dexar que sigas faciendo a destayu lo que meyor sabes facer. Como especialista semar engaños, crees les tos mentires. L’adictu nun tien cura, camientes reventando los mios oyíos y tu a min fáciesme falta hasta p’alendar.

            Mentirosu.

            Al entamu fixéronme falta munchos güeyos pa dame cuenta de que, querer ye poder. Tresformada mesmamente en min abrazo la vida cola esperanza de da-y un reflexu de lluz a esti mundu fartu de posesión y engañu. Entá asina quiero que sepias que sigo cola mesma costume –quietu, nun toques a deliriu enantes de que repiquen les campanes.

           

      Seliquina entrugo amoradina la pallabra escrita, nun puedo pasar d’ella. Quiero la verdá ensin solombres nin amenaces. Adoro’l papel blancu col rellume del que fala a la llibertá ganada mentantu’l sangre de les víctimes sigue regando la tierra escarnecío.

           

       Dende llonxe, cuasi una vida, tas col afoguín de caltrir la mio dignidá de muyer llevándome a escaecer na tierra regao por ti con cachos de naranxes amargues. Puede qu'un t’alcuerdes nin del mio nome, nin te fatigue nin migayu d’interés n’enterate. Déxame que te refresque la memoria:

       

      Alcuéntrote na cai de la ilusión en llinia col infiernu ensin salida. Ensin salida pa min, esbaries metanes la llocura. Alcuérdate que m’eslizaba de los tacones cuando decidí beber de los tos güeyos. Prestábame presumir de mozuca y nun cuntaba nin quince años. Una neña que necesita l’hombru d’un home que nun-y duelga miga presumir de muyeres ensin estrenar, tan bones pa esbabayar nelles.

           

           Y asina hasta que la muerte nos separe,  xuresti, namái que llanté la mio firma mesmamente nel minutu de nun alcontrame a min.

         Azorráu emprincipies a texer una telaraña enriba min. Tú yes l’amu. La heredá dexótela to padre. La mio facienda nun ye más que la dote alcordada, p’asina medrar a costa de mio. A cambiu del  trueque cuidaríes de min.

           

        Nel principiu aguyabes que la doma cola que m’aplastesti ensin reparu nun ye más que’l frutu del amor. Tabes enamoráu de min como un pazguatu y nun dibes  permitir que m’esbarrancare pel cantil como una tonta ensoñadora y namorada. Namorada de ti. Tu yeres el mio príncipe. El que me diba fartucar d’amor y felicidá.

           

      Nun minutu la tierra frío caltrió les llinies marcaes. Como una sacavera marquéstime’l tayu fríu. Alcuérdate. Trabayu duru, la tierra ye agradecío, pero ¡cuidáu…! Nin se m’ocurra gorgutar.

           

      Poquiñín a poquiñín los tos güeyos claros tórnense nun gris aceráu. Muerdes la risa, mentantu les tos manes m’arranquen el pelleyu del mio cuerpu abellugáu d’abandonu. Tas dientro min. Cómesme y vomítesme. Fadrás de min un puñáu d’astielles, nun vas dexar nin un res….y ¡a por otra qu’hai abondes!

           

       Allegrábasete’l cuerpu fustigándome cola vara d’ablanu, dende los pies a la cabeza, mentantu l’alma ruempe a pedazos. Tú yes l’amu. ¿Quién va faceme casu…?

           

       Nun retruques -esbabayabes cuspiendo les pallabres-. Nun sirves nin pa la cama. Nun sirves nin pa parir un nenu. Nun sirves nin pa dame gustu.

           

      Amoriada fartuquéme de llárimes. Nun sabía de min. Los farrapos recueyen ablucaos el mio cuerpu. La tierra escaecío ruempe recoyendo na so barriga les mios llárimes.

           

      -Van criticate en pueblu –retrucabes furiosu-. Xuro pal que quiera oyer, que dexesti abondo tiempu la casa sola, esquicies mientres ruempes la vara d’ablanu nes mios piernes. Y agora tápate con un pantalón nun se t’ocurra dir perhí con esa facha.

           

      Xiplabes mientres me dixebres el pelleyu col llátigu. Col últimu zarpazu esparramóse la vienda de los mios güeyos y como a un foriatu mal paríu escupite enteru de min -¿creyíes que nun yera a ello? Querer ye poder –dizme’l mio corazón-, y non hasta que la muerte nos separe, -la mio muerte, sentenciesti-. Y nun te preocupes polo que digan les persones decentes. Tamién equí, y nun lo duldes, alcontré una mano amiga. Una mano preparada pa semar lluz y esperanza.

           

       Pasáu'l tiempu, la mio pluma fiel trestocó a dentellaes la mio adicción a ti pola denuncia. Nun vas alcontrar furacu onde escondete. Gracies al aceru de los tos güeyos, na ruindá de la to sonrisa xabaz,  atopé la mio llibertá. Agora abrazo la vida y respiro l’aire acabáu de nacer. Naide y menos tu, va pesllar la mio vida enantes de vivir.