COSES DE LA TENSIÓN

       
24—8—2015 llectura de los Rellatos y entrega de Premios 

IX CONCURSU DE MICRO-RELLATOS N`ASTURIANU

           

 “L`HORRU DEL CARBAYEDO”

Publico un trocín del vídeo colgado en Facebook leyendo el relato, para verlo pincháis equí.

COSES DE LA TENSIÓN    (2º premiu)

      Ye abondo tarde, cuando entro en casa col pensamientu no que tengo de facer pal otru día. Duelme la tiesta  d'escuchar les quexes del mio xefe, contratóme unes hores p'aforrar perres. Llueu, apúrreme trabayu que me sal peles oreyes.

     ¡Qué ganes tengo d’echame nel sofá!, y al que-y apeteza un potaxe berces, que nun lo dulde y se ponga a ello, o que s'apañe con un cachu pizza, ¡qué voi facer, toi frayada!

    

      Xuan, el mio home, ye comercial. Tol día afogáu, diz. Mariola, la so xefa, amenázalu con mandalu al paru. Camienta que la xente tien fame pero, como nun tien perres…

   

     El probe ta desesperáu y cola tensión peles ñubes, cualquier día va  da-y daqué. Da lo mesmo pisar cai pa vender más y que la xefa tea contenta; pidiona y paez que llagartona, tol día reburdiando: que si la empresa va de mal en peor, que nun ve otra alternativa que prescindir de dalgunos folgazanes, y el que nun tea conforme, nun hai problema, el so puestu rifaránlu un garapiellu xente, y hasta por menos perres, si lo sabrá ella.

    

     Tola lluz ta enceso. Xuan —gríto-y—, esti despilfarru nun lo vamos poder pagar. ¿Tas mal de los güeyos, Xuan?

     Apago les lluces unes tres otres pero, ¡meca!, dalgo pasó. Ta too pates p’arriba. ¿Robáronnos, Xuan?, —digo glayando. Nesto, un ruíu estrañu salió del salón.

     Asoméme col mieu metíu en cuerpu. Xuan ruxi como un güe. Ehí ta espurríu encima'l sofá. ¡Probe!, los puños zarraos. ¡Ai!!!! De xuro que-y xubió la tensión de sópitu.

      Alloriada, marco emerxencies: el mio home ta muertu, —berro pel teléfonu—, o cuasi muertu; non, nun miré si respira, ¡carái!, vaya lo que pregunta esta xente, digo pa min—. ¡Entainen, por favor!

     Ensin saber qué facer, tírome de rodielles delantre la Santina. Xuntinos punxímosla nun requexucu del salón. Nesi momentu yéramos felices. Dempués los problemes económicos, les esixencies nel trabayu, a min el mio xefe, Facundo, a Xuan la so xefa, Mariola que lu tien amargáu.  

¡Probe Xuan!

     

     Los sanitarios y el médicu lleguen rápido. Abren-y los güeyos y la boquina hasta’l gorgueru. Les manes siguen apretaes como fierros

     

     El médicu punxo dalgo debaxo la llingua y Xuan escomenzó a espabilar. Taba mariáu —dixo—, ¿qué facía esa xente ehí…?

—Home, tuvo que ser que te xubió la tensión.  Llamélos yo.  Bien pensé que tabes muertu.

     El médicu decidió llevalu pal hospital pa face-y un estudiu completu. Al pasalu pa la camilla, la mano zarrada, afloxó-y, entós, el médicu garró d'aquella mano un cachu fueya…, miróme y díxome:

—Por si esto tuviere dalgo que ver cola tensión, lléalo con procuru, nun tenemos tiempu que perder.

     Ensin saber qué dicir, garro'l papel, desarrúgolu un pocoñín… Ye una carta escrita con lletra firme.  ¡Golía que restallaba! Mariola, la xefa del mio home, púnxolu na cai. Nun falaba nada de que les ventes fueren mal. Namái que, taba enamorada d'un mozu guapísimu y venti mil veces más bonu  qu’el mio home na cama. 

                                                

                                Autora: Luisa Méndez Fdez